Golaha Wakiillada Koonfur Galbeed oo la dhaariyay

Baydhabo (Dawan) – Xaflad ka dhacday magaalada Baydhabo ayaa maanta si rasmi ah loogu dhaariyay 95 xildhibaan oo ka tirsan Golaha Wakiillada Dowlad Goboleedka Koonfur Galbeed Soomaaliya.

Munaasabadda dhaarinta waxaa ka qeyb galay hoggaamiyaha Kumeelgaarka ah ee Koonfur Galbeed, Jibriil Cabdirashiid Xaaji, iyo musharraxa xilka madaxweynaha maamulkaas, Sheekh Aadan Maxamed Nuur (Madoobe), kuwaas oo hadallo ka jeediyay munaasabadda.

Jibriil Cabdirashiid Xaaji ayaa uga mahadceliyay Guddiga Doorashooyinka iyo dhammaan dhinacyadii ka qeyb qaatay qabsoomidda dhaarinta xildhibaannada cusub.

“Waxaan uga mahadcelinayaa guddiga doorashooyinka iyo dhammaan ka qeybgalayaasha dadaalkii ay geliyeen habsami u socodka dhaarinta xildhibaannada. Waxaan Alle ka baryayaa in xilkan loo dhaariyay uu noqdo mid si hufan loogu guto waajibaadka loo igmaday,” ayuu yiri.

Dhankiisa, musharraxa madaxweynaha Koonfur Galbeed, Sheekh Aadan Maxamed Nuur (Madoobe), ayaa bogaadiyay ka qeybgalka shacabka iyo habsami u socodka geeddi-socodka doorashada.

“Waxaan bogaadinayaa shacabka iyo dhammaan dhinacyadii ka qeyb qaatay doorashada. Waxaan ku boorrinayaa xildhibaannada la dhaariyay inay si daacadnimo iyo hufnaan leh u gutaan waajibaadkooda, isla markaana ay metelaan rabitaanka bulshada Koonfur Galbeed,” ayuu ku yiri, khudbad uu jeediyay Sheekh Aadan Madoobe.

Dhaarintan ayaa daba socota doorashadii Golaha Wakiillada ee ka dhacday 10-kii May 2026, taas oo lagu soo doortay xubnaha golaha. Guddiga Madaxa-bannaan ee Doorashooyinka Qaranka iyo Soohdimaha Soomaaliya (NIEBC) ayaa hore u shaaciyay liiska xildhibaannada ku guuleystay doorashada.

Dhaarinta maanta ayaa ka dhigan in Golaha Wakiillada Koonfur Galbeed uu si rasmi ah u guda galay waajibaadkiisa dastuuriga ah, iyadoo la filayo in xildhibaannada cusub ay bilaabaan shaqadooda sharci-dejinta iyo matalaadda shacabka.