Goorma ayaa loo asteeyay doorashada Galmudug?

Galmudug (Dawan) – Guddiga Madaxa-bannaan ee Doorashooyinka Qaranka iyo Soohdimaha (GMDQS) ayaa si rasmi ah u shaaciyay in doorashada Dowlad Goboleedka Galmudug la qaban doono 20-ka Luulyo 2026, kadib diyaargarow ballaaran oo ka socday maalmihii lasoo dhaafay degmooyinka gobollada Mudug iyo Galgaduud.

Guddiga ayaa sheegay in 215,860 codbixiye ay iska diiwaangeliyeen labada gobol ee Galmudug, taas oo qayb ka ah hannaanka doorashada qof iyo cod.

Sida xogta guddiga lagu sheegay, 116,590 codbixiye ayaa laga diiwaangeliyay gobolka Mudug, halka 99,270 codbixiye laga diiwaangeliyay gobolka Galgaduud.

Guddigu wuxuu sidoo kale sheegay in 117,305 codbixiye (54.38%) ay yihiin rag, halka 98,555 codbixiye (45.62%) ay yihiin dumar, iyadoo diiwaangelintu ka dhacday 1,633 goobood oo kala duwan.

Sidoo kale, guddigu ayaa soo bandhigay jadwalka doorashada, kaas oo qeexaya marxaladaha kala duwan ee geeddi-socodka, sida wacyigelinta codbixiyeyaasha, qaybinta kaararka codbixinta, diiwaangelinta musharraxiinta iyo xallinta cabashooyinka.

Sida ku cad jadwalka, ololaha wacyigelinta codbixiyeyaasha ayaa bilaaban doona 10-ka Luulyo, halka howlaha kale ee doorashada ay si tartiib tartiib ah u socon doonaan illaa maalinta codbixinta.

Doorashada Galmudug ayaa noqonaysa goobtii saddexaad ee Guddiga Doorashooyinka Qaranka uu ka hirgeliyo nidaamka qof iyo cod, kadib doorashooyin hore oo lagu qabtay Gobolka Banaadir iyo Koonfur Galbeed.