Galmudug (Dawan)– Guddiga Madaxabannaan ee Doorashooyinka Qaranka iyo Soohdimaha ayaa shaaciyay liisaska murashaxiinta ku matalaya urur siyaasadeedyada ka qaybgalaya doorashada ku-celiska ah ee isku-sidkan ee goleyaasha deegaanka iyo Golaha Wakiillada Dowlad-Goboleedka Galmudug.
Guddiga ayaa sheegay in 12 urur siyaasadeed ay muddadii loo qabtay ku soo gudbiyeen liisaska murashaxiintooda iyo shuruudihii laga doonayay. Muddada gudbinta liisaska ayaa ku ekayd 12-kii Sebteembar 2026.
Ururradii aan liisaska murashaxiintooda ku soo gudbin waqtiga loo cayimay ayuu guddigu sheegay in loo aqoonsaday kuwo aan diyaar u ahayn ka qaybgalka doorashada ku-celiska ah. Guddigu wuxuu caddeeyay in go’aankaasi ku kooban yahay u hoggaansanaanta habraaca doorashada, isla markaana aanu meesha ka saarayn jiritaanka sharci ee ururrada diiwaangashan.
Doorashada ku-celiska ah ayaa loo qorsheeyay inay dhacdo 30-ka Sebteembar 2026, halka ololaha doorashadu xirmayo 28-ka Sebteembar. Ka hor maalinta codbixinta, 22-ka Sebteembar ayaa ururrada laga doonayaa liisaska wakiilladooda goobaha codbixinta, halka 26-ka Sebteembar aqoonsi la siinayo wakiillada iyo korjoogtada.
