Muqdisho (Dawan)— Guddiga Madaxa-bannaan ee Doorashooyinka Qaranka iyo Soohdimaha Soomaaliya ayaa aqbalay go’aanka Maxkamadda Sare ee lagu buriyay natiijooyinkii doorashooyinka ka dhacay dowlad-goboleedka Galmudug, wuxuuna sheegay inuu qaban doono doorasho cusub.
Bayaan uu guddigu soo saaray maanta oo Arbaco ah ayuu ku sheegay inuu aqbalay go’aanka Maxkamadda Sare ee 24-kii Agoosto, kaas oo lagu buriyay natiijooyinkii doorashooyinka baarlamaanka iyo goleyaasha deegaanka Galmudug ee dhacay 30-kii July.
Guddigu wuxuu sheegay in go’aanka maxkamaddu uu ku saleysnaa qodobbada Dastuurka iyo shuruucda doorashooyinka, isla markaana uu ku jiray awoodaha Maxkamadda Sare.
Guddigu wuxuu sheegay inuu dhawaan ku dhawaaqi doono taariikhda dib loogu qabanayo doorashada Galmudug.
Sida lagu sheegay bayaanka guddiga, Maxkamadda Sare ayaa go’aamisay in doorashooyinkii hore aysan waafaqsanayn Dastuurka dalka iyo shuruucda doorashooyinka.
