Muqdisho (Dawan) – Guddiga Madaxa-bannaan ee Xuquuqul Insaanka Qaranka Soomaaliyeed ayaa si adag u cambaareeyay fal ay dhibbane u noqotay gabar Soomaaliyeed oo ka dhacay magaalada Muqdisho, isagoo sheegay in dhacdadaasi ay ka hor imaaneyso karaamada aadanaha, xuquuqda aasaasiga ah ee muwaadiniinta iyo xeerarka dalka iyo kuwa caalamiga ah ee ilaalinta xuquuqda aadanaha.
Guddoomiyaha Guddiga, Dr. Maryam Qaasim Axmed, ayaa ku baaqday in hay’adaha amniga iyo garsoorku ay sameeyaan baaritaan degdeg ah, hufan oo madax-bannaan, si dadka ku lugta leh falkaasi loo horkeeno caddaaladda.
Guddiga ayaa sidoo kale adkeeyay muhiimadda ay leedahay in dhibbanaha iyo qoyskeeda la siiyo taageero ku habboon, isla markaana la ilaaliyo xuquuqdooda iyo badqabkooda inta ay socdaan baaritaannada iyo hannaanka caddaaladda.
