Muqdisho (Dawan)- Guddoomiyaha Golaha Shacabka ee Baarlamaanka Federaalka Soomaaliya, Cabduqaadir Maxamed Nuur ayaa difaacay go’aanka mushaharka looga jaray xildhibaannada ka maqnaada fadhiyada Golaha, isagoo sheegay in tallaabadaasi loo maray habraacyada xeer-hoosaadka Baarlamaanka.
Guddoomiyaha ayaa sheegay in xildhibaannada aan ku qanacsanayn go’aanka ay haystaan muddo 15 maalmood ah oo ay racfaan ku gudbin karaan, isla markaana ay arrinta horgeyn karaan Golaha Shacabka si dood sharciyeed looga yeesho.
“Aniga shaqsiyan diyaar uma ihi in xildhibaan ka mid ah xildhibaannada Soomaaliyeed subax walba halkan u soo kalaho, midna gurigiisa dibadda ah ama dalka ah kafeygiisa isaga cabbo, halkan danooyinka ka daawado, inaan halkan ku guddoomiyo diyaar uma ihi,” ayuu yiri Guddoomiyuhu.
Wuxuu xusay in aan la aqbali karin in xildhibaano aan gudan waajibaadkooda shaqo ay sii qaataan mushaharka, isagoo carrabka ku adkeeyay in xubnaha Baarlamaanka ay waajib ku tahay ka soo qaybgalka fadhiyada iyo gudashada shaqada loo igmaday. Guddoomiyuhu wuxuu sidoo kale sheegay in go’aanka mushahar-jarista uu soo maray hannaan hubin ah oo ay ku lug lahaayeen guddiga xeer-hoosaadka iyo dib-u-eegista dukumentiyada la xiriira xaadiritaanka xildhibaannada.
