Muqdisho (Dawan) – Madaxweynaha Dowlad Goboleedka Hirshabeelle, Cali Cabdullaahi Xuseen (Cali Guudlaawe), ayaa sheegay in waddada isku xirta Muqdisho iyo Jowhar ay isticmaalaan shacabka ku safra gaadiidka rayidka ah iyo ciidamada ammaanka, balse ay weli jiraan khataro amni oo sababa in mas'uuliyiin badan ay ku safraan diyaarado.
Wareysi gaar ah oo uu siiyay barnaamijka Miizaan Podcast ee ka baxa Dawan Media, ayuu madaxweynuhu ku sheegay in kooxda Al-Shabaab ay mararka qaar soo galaan deegaannada ku teedsan waddada, isla markaana ay fuliyaan falal lagu carqaladeynayo isu socodka dadka.
“Waddada dadku way iska maraan. Waxaa jira nimanka nabad-diidka ah (Al-Shabaab), mararka qaar waxay soo galaan iyaga oo cararaya, waxna way carqaladeeyaan ama miinooyin ayay ku aasaan meelo ka mid ah waddada. Taas ayaana keentay in mas'uuliyiinta badankood ay diyaarad ku safraan. Laakiin ciidamada iyo shacabka guud ahaan way maraan waddada,” ayuu yiri Cali Guudlaawe.
Madaxweynuhu ayaa tilmaamay in ciidamada ammaanka ay si joogto ah uga shaqeeyaan sugidda amniga waddada, isla markaana ay socdaan dadaallo lagu ciribtirayo khataraha weli ka jira qaybo ka mid ah marinnada isku xira Muqdisho iyo magaalooyinka Hirshabeelle.
