Halkee ku yaal ceelka ugu horreeya ee shidaalka Soomaaliya?

Muqdisho (Dawan) — Wasiirka Batroolka iyo Macdanta Soomaaliya, Daahir Shire Maxamed, ayaa sheegay in ceelka shidaalka ee Curad-1 laga qodi doono badda dowlad-goboleedka Galmudug, isagoo bixiyay faahfaahin dheeraad ah oo ku saabsan goobta mashruuca.

Isagoo ka hadlayay barnaamijka Miizaan Podcast ee ka baxa Dawan Media, wasiirka ayaa sheegay in ceelka laga qodi doono goob u dhaxeysa xeebaha u dhexeeya Mareeg iyo Xarardheere.

“Curad-1 waxaa laga qodayaa badda ku toosan Dowlad-Goboleedka Galmudug, gaar ahaan inta u dhaxeysa Mareeg ilaa Xarardheere,” ayuu yiri wasiirku.

Wuxuu intaas ku daray in goobtu aad uga fog tahay berriga, isla markaana ay ku taallo meel qoto dheer oo badda ah.

“Aad buu uga fog yahay berriga, waxaana u jiraa masaafo ku dhow 275 km,” ayuu yiri.

Faahfaahintan ayaa imaneysa xilli Soomaaliya ay isu diyaarinayso bilowga qodista ugu horreysa ee shidaal, kaddib markii markabka qodista ee Turkiga laga leeyahay ee Çağrı Bey uu soo gaaray magaalada Muqdisho.

Mas’uuliyiinta dowladda ayaa sheegaya in mashruucan uu yahay tallaabo muhiim ah oo lagu horumarinayo ka faa’iideysiga khayraadka dabiiciga ah ee dalka.