Muqdisho (Dawan) – Hantidhowraha Guud ee Jamhuuriyadda Federaalka Soomaaliya, Axmed Ciise Guutaale, iyo Wakiilka Soomaaliya ee Shirkadda Favori LLC, Mustafa Durgut, ayaa kulan ka yeeshay hagaajinta iyo diyaarinta warbixinnada maaliyadeed ee shirkadda, si loo xaqiijiyo in dakhliga Garoonka Caalamiga ah ee Aadan Cadde loo diiwaangeliyo si hufan oo daahfuran.
Kulanka ayaa si gaar ah diiradda loogu saaray sidii Favori LLC ay u fulin lahayd talooyinkii Hantidhowrka Guud ee la xiriiray maamulka dakhliga iyo baarista sanadlaha ah ee warbixinnada maaliyadeed, iyadoo sidoo kale laga wada hadlay in shirkaddu si buuxda u hirgeliso heshiiska dheef-wadaagga ah ee ay kula jirto Dowladda Federaalka Soomaaliya.
Mas’uuliyiinta ayaa carrabka ku adkeeyay muhiimadda ay leedahay in warbixinnada maaliyadeed ee Favori LLC ay maraan baaris madax-bannaan sannad kasta, kadibna lagu soo gudbiyo hay’adaha dowladda ee ay khusayso muddada uu dhigayo heshiiska.
Warbixinnadii Hantidhowrka Guud ee sanadihii u dambeeyay ayaa si joogto ah u muujiyay walaac ku saabsan habka loo xaqiijiyo dakhliga dowladda uga soo xarooda heshiisyada dheef-wadaagga. Hantidhowrku wuxuu sheegay in maqnaanshaha warbixinnada maaliyadeed ee la baaray ay adkeynayso in si madax-bannaan loo xaqiijiyo saxnaanta saamiga dowladda.
