Muqdisho (Dawan) – Xafiiska Hanti-dhowrka Guud ee Soomaaliya ayaa ugu baaqay Guddiga Shaqaalaha Rayidka inuu ixtiraamo madax-bannaanida dastuuriga, maamul iyo maaliyadeed ee Xafiiska, isagoo sheegay in dhammaan go’aannada la xiriira Xafiiska ay waafaqaan Dastuurka iyo shuruucda lagu maamulo.
Xafiiska ayaa qoraal uu soo saaray Talaadadii ku sheegay inuu yahay hay’ad dastuuri ah oo madax-bannaan, taas oo lagu dhisay Qodobka 177-aad ee Dastuurka.
Awoodaha, waajibaadka iyo shaqooyinka Xafiiska waxaa sidoo kale lagu qeexay Sharciga Maamulka Maaliyadda Dadweynaha, Sharciga Lr. 17 ee 2019, iyo Sharciga Xafiiska Hanti-dhowrka Guud, Sharciga Lr. 14 ee 2023, sida lagu sheegay qoraalka.
Xafiisku wuxuu sheegay in waajibaadkiisa ay ka mid yihiin hubinta xisaabaadka, diiwaangelinta iyo ilaalinta hantida dadweynaha iyo dhaqdhaqaaqyada maaliyadeed ee dowladda, iyo sidoo kale kormeerka iyo dabagalka maamulka kheyraadka dadweynaha.
Waxa kale oo uu mas’uul ka yahay la socodka u hoggaansanaanta shuruucda maamusha maamulka maaliyadda dadweynaha iyo miisaaniyadda dowladda federaalka.