Hargeysa (Dawan)– Ciidamada Booliska Somaliland ayaa xabsiga u taxaabay Guddoomiyaha Jaamacadda Beder, Garyaqaan Mubaarik Aar, kaddib markii uu su’aalo ka keenay aqoonsiga Israa’iil ee Somaliland iyo ku biirista heshiiska Abraham Accords, sida ay sheegeen ilo xog-ogaal ah.
Xariga Mubaarik Aar, oo dhacay 27-ka Diseembar 2025, ayaa yimid kaddib markii uu soo saaray war-saxaafadeed uu ku lafa-guray waxa Somaliland ay ka faa’iidi karto aqoonsiga Israa’iil iyo sababta ay ugu biireyso heshiiska Abraham, oo ah is-afgarad diblomaasiyadeed ay Israa’iil xiriir kula yeelato dalal Carbeed.
"Madaxweyne inagu ictiraaf baan helnay ee Israa'iil maxay heshay oo is-weydaarsanay?" ayuu yiri, Aar
Aar, oo caan ku ah ka hadalka arrimaha siyaasadda, ayaa hadalkiisa ku muujiyay su’aalo ku saabsan saamaynta heshiiskaasi ku yeelan karo bulshada Somaliland, gaar ahaan sida loo qancin karo dadweynaha oo maalmihii hore bannaanbaxyo ka dhigayay waxa ay Israa’iil ka waddo Qasa.
