Muqdisho (Dawan) — Hawlgalka Midowga Yurub ee taageerada awoodda amniga Soomaaliya (EUCAP Somalia) ayaa soo gabagabeeyay tababar heer istiraatiiji ah oo socday 10 maalmood, kaas oo lagu xoojinayay awoodda hoggaamiyeyaasha sare ee booliiska ee qorsheynta iyo isku-duwidda hawlgallada.
Tababarkan oo la soo gabagabeeyay Khamiistii ayaa diiradda lagu saaray sidii hoggaamiyeyaasha booliisku ay jihaynta istiraatiijiga ah ugu beddeli lahaayeen qorshayaal hawlgal oo muddo-dheer ah, isla markaana si hufan loogu hawlgelin lahaa cutubyada booliiska.
Barnaamijka waxaa ka qaybgalay hoggaamiyeyaal sare oo ka kala socday Xarunta Xaaladaha (Situation Room), Xarunta Taliska Hawlgallada iyo Xarunta Hawlgallada Wadajirka ah.
Intii uu tababarku socday, waxaa xoogga la saaray horumarinta isgaarsiinta istiraatiijiga ah, wadaagga macluumaadka iyo isku-duwidda hay’adaha, si loo xoojiyo qorsheynta, taliska iyo fulinta hawlgallada booliiska.
