Hoggaamiyeyaasha Soomaaliya iyo Qatar oo ka wada hadlay xoojinta iskaashiga

Muqdisho, 16 Febraayo 2026 (Dawan) — Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa khadka taleefanka kula hadlay Amiirka Dowladda Qatar, Sheekh Tamiim bin Hamad Al Thani, iyagoo ka wada hadlay xaaladda Soomaaliya iyo xoojinta xiriirka istiraatiijiga ah ee u dhexeeya labada dal.

Wadahadalkan ayaa diiradda lagu saaray horumarka xaaladda amniga iyo dadaallada lagu xoojinayo xasilloonida, midnimada dhuleed, iyo dhismaha hay’adaha dowladda Soomaaliya.

Amiirka Qatar ayaa intii uu socday xiriirka dib u xaqiijiyay taageerada buuxda ee dalkiisa uu u hayo hay’adaha rasmiga ah ee dowladda Soomaaliya, isagoo muujiyay sida ay Qatar uga go’an tahay adkeynta amniga, xasilloonida, iyo ilaalinta danaha shacabka Soomaaliyeed.

Dhankiisa, Madaxweyne Xasan Sheekh Maxamuud ayaa uga mahadceliyay Dowladda Qatar taageerada joogtada ah ee ay siiso Soomaaliya, gaar ahaan dhinacyada siyaasadda, horumarinta kaabeyaasha dhaqaalaha, gargaarka bani’aadannimo, iyo dhismaha hay’adaha dowliga ah. Madaxweynaha ayaa sidoo kale bogaadiyay mowqifka Qatar ee ku aaddan garab istaagga madax-bannaanida iyo midnimada dhuleed ee Soomaaliya.

Labada hoggaamiye ayaa intii ay wada hadleen sidoo kale ka arrinsaday fursadaha lagu sii horumarin karo iskaashiga laba geesoodka ah iyo sidii loo xoojin lahaa wada shaqeynta mustaqbalka, taas oo muujinaysa xiriirka dhow ee ka dhexeeya Soomaaliya iyo Qatar.