Muqdisho 22 December (Dawan)– Maamulka Gobolka Banaadir ayaa si rasmi ah u ansixiyay miisaaniyadda sanadka 2026, taas oo dhan 63.8 milyan oo doollar, kaddib codeyn ay taageereen 45 xubnood, halka hal xubin uu ka horyimid, mana jirin cid ka aamustay.
Sida uu maamulka gobolka sheegay, miisaaniyadda cusub waxay mudnaan siinaysaa horumarinta adeegyada aasaasiga ah, amniga, mashaariicda horumarineed iyo kobcinta kaabeyaasha dhaqaalaha, iyadoo lagu talagalay in lagu daboolo baahiyaha degdegga ah ee caasimadda.
Si kastaba ha ahaatee, miisaaniyadda 2026 ayaa muujinaysa hoos u dhac muuqda marka loo eego sanadihii hore. Miisaaniyadda 2025 waxay gaareysay 100 milyan oo doollar, halka tan 2024 ay ahayd 67.96 milyan oo doollar, taas oo ka sarreysa miisaaniyadda hadda la ansixiyay.
