Muqdisho (Dawan) – Hay’adda Dhowrista Xogta Dadweynaha Soomaaliya ayaa soo gabagabeysay tababar shan maalmood socday oo loo qabtay hay’adaha dowladda iyo kuwa gaarka loo leeyahay, kaas oo diiradda lagu saaray hirgelinta Sharciga Dhowrista Xogta Soomaaliya, sida ay sheegtay hay’addu.
Tababarka waxaa soo xiray Maareeyaha Guud ee Hay’adda Dhowrista Xogta Dadweynaha, Maxamed Nuur Colow, waxaana si gaar ah diiradda loogu saaray fahamka iyo hirgelinta Sharciga Dhowrista Xogta ee Soomaaliya oo la ansixiyay sanadkii 2023.
Sharcigan oo lagu magacaabo Xeer Lr. 005 ee 2023 ayaa la saxiixay bishii Maarso 2023, wuxuuna aasaasay Hay’adda Dhowrista Xogta Dadweynaha, oo ah hay’adda qaran ee mas’uulka ka ah ilaalinta xogta shakhsiga ah, dhowrista asturnaanta, iyo kor u qaadista hab-dhaqanka mas’uuliyadda leh ee xogta ee hay’adaha dowladda iyo kuwa gaarka loo leeyahay.
Tababarka waxaa ka qeybgalay shaqaale iyo daneeyayaal ka kala socday hay’adaha gacanta ku haya xogta shakhsiga ah, kuwaas oo isugu jiray hay’adaha dowladda iyo kuwa gaarka loo leeyahay.
Intii uu socday tababarka, ka qeybgalayaasha ayaa lagu baray aasaaska asturnaanta xogta, mabaadi’da dhowrista xogta, muhiimadda ilaalinta xogta dadweynaha, iyo waajibaadka saaran hay’adaha iyo shakhsiyaadka maamula xogta shakhsiga ah.
