Howlwadeennada Dowladaha Hoose oo loo tababarayo diyaarinta warbixinnada

Muqdisho (Dawan) – Wasaaradda Arrimaha Gudaha, Federaalka iyo Dib-u-heshiisiinta ee Dowladda Federaalka Soomaaliya ayaa Sabtidii daahfurtay tababar soconaya muddo saddex maalmood ah oo lagu tayeynayo diyaarinta iyo soo saarista warbixinnada iyo majaladaha dowladaha hoose ee dowlad-goboleedyada dalka.

Tababarka waxaa ka qeybgalaya howlwadeeno iyo saraakiil ka kala socota dowlad-goboleedyada xubnaha ka ah dowladda federaalka, iyadoo dowladda ay sheegtay in ujeeddadu tahay horumarinta habka lagu diiwaangeliyo waxqabadka iyo horumarka dowladaha hoose.

Tababarka waxaa daahfuray Agaasimaha Waaxda Dowladaha Hoose ee wasaaradda, Yaxye Cumar Xersi, kaas oo sheegay in majaladaha noocan ah ay muhiim u yihiin soo bandhigista horumarrada, sheekooyinka guusha iyo doorka dowladaha hoose ee adeegyada bulshada iyo dowlad-wanaagga.

Wasaaradda ayaa sheegtay in tababarku diiradda saarayo xirfadaha qorista nuxurka, sheeko-curinta, xaqiijinta xogta, sawir-qaadista iyo farsamooyinka daabacaadda, si loo helo warbixinno mideysan oo xirfadeysan.

Soomaaliya ayaa leh in ka badan 90 degmo oo ku kala yaalla dowlad-goboleedyada dalka, iyadoo maamullada dowladaha hoose ay door sii kordhaya ku leeyihiin maamulka iyo bixinta adeegyada bulshada.

Dowladda federaalka ayaa sanadihii u dambeeyay wadday dadaallo lagu xoojinayo nidaamka dowladaha hoose iyo kor u qaadista adeegyada maamulka heer deegaan, iyadoo dhawaan qaar kamid ah degmooyinka dalka ay ka qabsoomeen doorashooyin qof iyo cod ah.

Dhanka kale, Soomaaliya ayaa weli wajahaysa caqabado la xiriira maamulka deegaanka, awoodda hay’adaha dowladaha hoose iyo helitaanka adeegyada bulshada ee deegaanno badan oo dalka kamid ah.