Garoowe (Dawan) – Tirada ardayda u fariisatay imtixaannada shahaadiga ah ee Puntland ayaa korortay 6.1% sannad-dugsiyeedkan, iyadoo gaartay 25,221 arday, sida ay Sabtidii shaacisay Wasaaradda Waxbarashada iyo Tacliinta Sare ee Puntland.
Wasaaraddu waxay sheegtay in 16,068 arday oo dhigata fasalka 8-aad iyo 9,153 arday oo dhigata fasalka 12-aad ay u fariisteen imtixaannada shahaadiga ah ee sannad-dugsiyeedka 2025–2026.
Imtixaannada ayaa lagu galay 161 xarumood oo ku yaalla deegaannada Puntland, kuwaas oo 98 ka mid ahi loogu talagalay fasalka 8-aad, halka 63 xarumood loo asteeyay fasalka 12-aad.
Sannad-dugsiyeedkii hore ee 2024–2025, tirada guud ee ardayda u fariisatay imtixaannada shahaadiga ah waxay ahayd 23,768 arday. Taas macnaheedu waa in sannadkan ay tiradu korortay 1,453 arday.
