Imisa ayuu gaaray helitaanka adeegyada caafimaadka Soomaaliya?

Geneva (Dawan) – Soomaaliya ayaa sheegtay in helitaanka adeegyada caafimaadka aasaasiga ah uu kor uga kacay 42% sanadkii 2020 ilaa in ka badan 65% sanadkii 2025, sida uu sheegay Wasiirka Caafimaadka iyo Daryeelka Bulshada Soomaaliya, Cali Xaaji Aadan, xilli uu khudbad ka jeedinayay Shirweynaha 79-aad ee Golaha Caafimaadka Adduunka Arbacadii.

Wasiirka ayaa sheegay in kororka daboolidda adeegyada caafimaadka uu ka tarjumayo dadaallada dowladda ee lagu ballaarinayo adeegyada caafimaadka iyo xoojinta nidaamka caafimaadka dalka, xilli Soomaaliya ay weli wajahayso caqabado la xiriira amniga, isbeddelka cimilada iyo maalgelinta.

“Daboolidda adeegyada daryeelka caafimaadka aasaasiga ah waxay ka korortay 42% sanadkii 2020 ilaa in ka badan 65% sanadkii 2025,” ayuu yiri wasiirku.

Soomaaliya ayaa sidoo kale sheegtay in heerka tallaalka carruurta uu gaaray ku dhowaad 70%, halka nidaamyada la socodka cudurrada iyo adeegyada caafimaadka dhijitaalka ah la gaarsiiyay 98% xarumaha caafimaadka ee dalka.

Dowladdu waxay sheegtay in kororka helitaanka adeegyada caafimaadka uu ka dhashay maalgelin lagu sameeyay daryeelka caafimaadka aasaasiga ah, ballaarinta adeegyada hooyada iyo dhallaanka, iyo xoojinta kaabeyaasha caafimaadka ee gobollada dalka.

Soomaaliya ayaa sidoo kale sheegtay inay Muqdisho ka hirgelisay xaruntii ugu horreysay ee qaran ee keydinta iyo qaboojinta tallaallada, isla markaana ay xoojisay nidaamyada maamulka dawooyinka kadib ansixinta Sharciga Dawooyinka Soomaaliyeed ee Baarlamaanka Federaalka.

Khudbadda wasiirka ayaa sidoo kale lagu xusay in Golaha Qaranka ee Xirfadlayaasha Caafimaadka la hawlgeliyay si loo xoojiyo nidaaminta iyo tayeynta shaqaalaha caafimaadka iyadoo la waafajinayo heerarka caalamiga ah ee maamulka caafimaadka.

Inkasta oo horumarkan la gaaray, dowladda ayaa sheegtay in heerarka dhimashada hooyooyinka iyo carruurta ay weli aad u sarreyaan , halka abaaraha, fatahaadaha, xaaladaha amni darrada iyo yaraanta maalgelinta ay uga sii darayaan culayska saaran nidaamka caafimaadka.

Dowladda Soomaaliya ayaa sheegtay inay ka jawaabtay caqabadahaas iyadoo hirgelisay dib-u-habeyn lagu xoojinayo maamulka caafimaadka, qorsheynta adeegyada iyo maalgelinta gudaha ee waaxda caafimaadka.

Soomaaliya ayaa ugu baaqday dalalka xubnaha ka ah Hay’adda Caafimaadka Adduunka (WHO) iyo hay’adaha caalamiga ah inay sii kordhiyaan maalgashiga lagu sameynayo nidaamyada caafimaadka ee dalalka nugul, gaar ahaan kuwa ay saameeyeen colaadaha iyo xaaladaha bani’aadantinimo.