Imtixaanka Qareennimada Qaranka oo ay u fariisteen in ka badan 300 oo qof

Muqdisho (Dawan) – Magaalada Muqdisho waxaa maanta oo Khamiis ah ka billowday imtixaanka qareennimada qaranka ee sannadka 2026, kaas oo ay u fariisteen 302 qof oo doonaya inay helaan shahaadada iyo shatiga rasmiga ah ee qareennimada, si ay si sharci ah ugu gutaan waajibaadka xirfadda qareennimo.

Imtixaanka ayaa ka socda xarunta Jaamacadda Ummadda Soomaaliyeed, waxaana loo qorsheeyay inuu socdo muddo saddex saacadood. Qof kasta oo ku guuleysta imtixaanka waxaa la siin doonaa shahaadada qareennimada iyo shatiga ku shaqeysiga xirfadda, taas oo u oggolaaneysa inuu si rasmi ah uga howlgalo dalka.

Wasiirka Wasaaradda Cadaaladda iyo Arrimaha Dastuurka, Xasan Macallin Maxamuud, ayaa sheegay in tirada musharraxiinta maanta u fariisatay imtixaanka ay ka tarjumeyso kororka kalsoonida lagu qabo nidaamka caddaaladda iyo sharciga.

“Waxay tani ku tusineysaa sida weyn ee laba-laabka iyo saddex-laabka ah ee loo soo qaabilay sharciga. Ardaydaas guul ayaan u rajeynaynaa,” ayuu yiri wasiirku.

Qabanqaabada iyo hirgelinta imtixaanka waxaa iska kaashanaya Wasaaradda Cadaaladda iyo Arrimaha Dastuurka, Maxkamadda Sare, Xafiiska Xeer Ilaaliyaha Guud iyo Guddiga Imtixaanaadka Qareennimada, kuwaas oo si wadajir ah u maamulaya habsami u socodka imtixaanka.

Ka hor inta aysan u fariisan imtixaanka, musharraxiinta waxaa laga doonayay inay buuxiyaan shuruudo ay ka mid yihiin lahaanshaha shahaado jaamacadeed oo dhanka Shareecada ama Sharciga ah, iyo ugu yaraan hal sano oo khibrad ama tababar xirfadeed oo la xiriira garsoorka ama qareennimada.

Mas’uuliyiinta ayaa sheegay in imtixaanku yahay hannaan lagu xaqiijinayo tayada iyo aqoonta qareennada cusub, si loo helo xirfadlayaal awood u leh inay kaalin muuqata ka qaataan horumarinta nidaamka caddaaladda ee Soomaaliya.

Imtixaanka qareennimada qaranka ayaa ah hannaan sanadle ah oo lagu qiimeeyo laguna soo xulo qareennada cusub. Inkastoo aanu qabsoomin sannadkii hore, dib u qabashadiisa sannadkan ayaa loo arkaa tallaabo lagu xoojinayo tayada adeegyada garsoorka iyo kobcinta hannaanka caddaaladda ee dalka.