Hargeysa (Dawan)— In ka badan 16,000 arday ayaa ka gudbay imtixaanka fasalka afraad ee dugsiyada sare ee Somaliland, sida uu sheegay Wasiirka Waxbarashada iyo Sayniska Somaliland, Ismaaciil Ducaale Yuusuf maanta oo Talaado ah.
Wasiirku wuxuu sheegay in 16,051 arday ay ka gudbeen imtixaanka, halka 27 arday aysan gudbin, iyadoo 41 arday ay ka maqnaayeen imtixaanka sababo la xiriira caqabado ay la kulmeen.
Wasiirku wuxuu hambalyo u diray ardayda gudubtay, waalidiintooda iyo macallimiintii wax baraysay, isagoo sheegay in arday badan ay u gudbi doonaan marxaladda xigta ee waxbarashada ama ay bilaabi doonaan nolol shaqo.
Dhanka dugsiyada hoose-dhexe, wasiirku wuxuu sheegay in 26,116 arday ay u fariisteen imtixaanka fasalka siddeedaad, kuwaas oo 14,407 ay ahaayeen wiilal, halka 11,709 ay ahaayeen gabdho.
