Addis Ababa (Dawan)— In ka badan 720 qof ayaa ku dhaawacmay dagaallada ka soo cusboonaaday waqooyiga Itoobiya tan iyo 22-kii Sebtembar, iyadoo isbitaallada Tigray ay la tacaalayaan koror xooggan oo ku yimid dadka qaba dhaawacyada dagaalka.
Hay'adda Dhaqaatiirta aan xuduudka lahayn (MSF) ayaa isniintii sheegtay in xarumaha caafimaadka ee Korem, Alamata iyo Shire ay wajahaan cadaadis sii kordhaya, iyadoo kooxaha caafimaadku kordhiyeen gurmadka degdegga ah, halka qaar ka mid ah howlahana la hakiyay sababo la xiriira amni-darro.
Isbitaallada Korem iyo Alamata ayaa diiwaangeliyay in ka badan 420 qof oo dhaawac ah intii u dhaxaysay 22-kii iyo 25-kii Sebtembar, marka loo eego ku dhowaad 180 qof oo la soo gaarsiiyay 48-kii saacadood ee ka horreeyay. Shire, in ka badan 300 qof oo dhaawac ah ayaa gaaray Isbitaalka Suhul illaa 25-kii Sebtembar.
MSF ayaa sheegtay in kororka dhaawacyadu uu ka dhashay dagaallada u dhexeeya xoogagga Tigray People’s Liberation Front (TPLF) iyo kooxaha xulafada la ah, iyo Ciidanka Difaaca Qaranka Itoobiya (ENDF).
“Xaaladda ka jirta waqooyiga Itoobiya waa mid aad walaac u leh,” ayay MSF tiri, iyadoo xustay in dagaallada cusub ay daba socdeen xiisado sii kordhayay, dagaallo culus iyo duqeymo diyaaradaha aan duuliyaha lahayn ah.
MSF ayaa kordhisay howlaheeda caafimaad tan iyo 22-kii Sebtembar, iyadoo weli taageeraysa isbitaallada Shire, Sheraro iyo Korem, oo ay ka fuliso adeegyo caafimaad oo ay ku jiraan daryeelka hooyada iyo carruurta.
Si kastaba ha ahaate, ururku wuxuu hakiyay howlihii uu ka hayay Isbitaalka Alamata sababo la xiriira xaaladda amni ee sii xumaanaysa. Hawlihii caafimaadka ee bulshada lagu gaarsiinayay adeegyada ayaa sidoo kale la hakiyay, iyadoo shaqaalaha loo wareejiyay isbitaallada ay soo gaarayaan tiro badan oo dhaawac ah.
Dagaallada ayaa sidoo kale sababay barakaca dad rayid ah oo ka dhacay Tigray, Amhara iyo Afar. MSF ayaa sheegtay inay la socoto xaaladda barakaca, ayna diyaar u tahay inay ka jawaabto baahiyaha dadka ka cararaya goobaha colaadaha.
