Marseille (Dawan)— Wafdi ka socda Dowladda Jabuuti ayaa kulamo la yeeshay mas’uuliyiin ka tirsan dowladda hoose, jaamacadaha iyo maamulka dekedaha ee koonfurta Faransiiska, iyaga oo diiradda saaray xoojinta iskaashiga dhinacyada diblomaasiyadda, waxbarashada, tamarta iyo arrimaha badda sida ay sheegtay wakaalada wararka Jabuuti sabtidii .
Kulamadan ayaa ka dhacay magaalooyinka Toulon iyo Marseille intii u dhexeysay 6-dii iyo 9-kii Oktoobar, xilli wafdigu ka qaybgalayay Madasha Shanaad ee Wadahadallada Istaraatiijiga ah ee Badda Mediterranean-ka (RSMed), oo qabsoontay 7-dii iyo 8-dii bishan.
Wafdiga Jabuuti ayaa ka koobnaa Xasan Cumar Maxamed, agaasimaha Machadka Daraasaadka Diblomaasiyadda; Dr. Sacad Saalax Saciid, agaasimaha Xarunta Cilmi-baarista Tamarta iyo Deegaanka ee Jaamacadda Jabuuti; iyo Maxamuud Rooble Dabar, isku-duwaha iskaashiga u dhexeeya Jabuuti iyo gobolka Koonfurta Faransiiska. Wafdigu wuxuu matalayay Wasaaradda Arrimaha Dibadda iyo Iskaashiga Caalamiga ah iyo Jaamacadda Jabuuti.
Kulamadii ugu horreeyay ee wafdiga waxaa ka mid ahaa kulan ay la yeesheen Guillaume Huet, oo mas’uul ka ah iskaashiga gobolka Koonfurta Faransiiska, kaas oo looga hadlay xoojinta xiriirka iyo iskaashiga u dhexeeya labada dhinac.
