Jabuuti (Dawan)— Wasiirka Caafimaadka Jabuuti Mouna Osman Aden ayaa la kulantay madaxa cusub ee xafiiska UNFPA ee Jabuuti, Amina Abdoulkader Mohamed, si ay uga wada hadlaan iskaashiga dhinacyada caafimaadka hooyada iyo taranka, qorsheynta qoyska iyo adeegyada dhallinyarada, sida ay sheegtay Wakaaladda Wararka Jabuuti ee ADI Khamiistii.
Kulanka ayaa yimid kaddib markii Amina ay la wareegtay xilkeeda cusub, waxaana diiradda lagu saaray xoojinta iskaashiga u dhexeeya Wasaaradda Caafimaadka iyo UNFPA, oo muddo dheer bah-wadaag la ahayd dowladda Jabuuti.
Labada dhinac ayaa ka wada hadlay caafimaadka hooyada iyo taranka, qorsheynta qoyska iyo caafimaadka dhallinyarada iyo da’yarta, iyo sidoo kale sidii loo hagaajin lahaa helitaanka adeegyo caafimaad oo tayo leh oo ay helaan haweenka, gabdhaha iyo bulshada.
Mouna ayaa soo dhaweysay taageerada UNFPA, iyadoo xaqiijisay in dowladda Jabuuti ay diyaar u tahay inay sii xoojiso iskaashiga, si loo horumariyo caafimaadka iyo fayo-qabka bulshada.
Amina ayaa dhankeeda sheegtay in UNFPA ay diyaar u tahay inay taageerto wasaaradda si ay u hirgeliso mudnaanta caafimaad ee qaranka iyo inay sii waddo barnaamijyada hadda socda, sida ay ADI sheegtay.
