Beijing (Dawan) – Dowladda Jabuuti ayaa Isniintii magaalada Beijing ku soo bandhigtay qorshe cusub oo lagu xoojinayo iskaashiga warshadaha ee kala dhexeeya Shiinaha, iyadoo bartilmaameedku yahay soo jiidashada maalgelin cusub, horumarinta wax-soo-saarka gudaha iyo kobcinta dhoofinta.
Wasiirka Dhaqaalaha iyo Maaliyadda ee Jabuuti, ahna masuulka warshadaha, Ilyaas Muuse Dawaaleh, ayaa qorshahan ka jeediyay kulan ka dhacay xarunta Bangiga Dhoofinta iyo Soo-dejinta Shiinaha (China Exim Bank), halkaas oo ay ku sugnaayeen mas’uuliyiin iyo shirkado Shiinees ah oo waaweyn.
Wasiirka ayaa sheegay in Jabuuti ay hiigsaneyso inay noqoto xarun warshadeed iyo mid tiknoolajiyadeed oo muhiim u ah gobolka Geeska Afrika, isagoo xusay in qorshuhu diiradda saarayo horumarinta jardiinooyin warshadeed oo cagaaran, ka faa’iidaysiga warshadaynta milixda, warshadaha isu-ururinta qalabka, iyo farsamaynta wax-soo-saarka beeraha iyo kalluunka.
