Jabuuti, 04, Oktober 2025 – Dowladda Jabuuti ayaa ku dhawaaqday inay hirgelin doonto tallaalka ka hortagga kansarka ilmo-galeenka, iyadoo wasaaradda caafimaadka iyo hay’ado caalami ah ay si wadajir ah u sheegayaan in tallaabadan ay muhiim u tahay badbaadinta nolosha haweenka.
Munaasabadda oo lagu qabtay caasimadda Jabuuti Jimcihii, waxaa ka qeyb galay in ka badan 80 wakiilo oo ka kala socday hay’adaha caafimaadka dowladda, kuwa gaarka loo leeyahay, iyo Hay’adda Caafimaadka Adduunka (WHO). Wasiirka caafimaadka Axmed Rooble ayaa sheegay in tallaalku yahay fursad lagu yareynayo halista cudurkan ee ku badan haweenka.
“Dhawaann waxaannu hirgelin doonaa tallaalka, waxaana ujeedkiisu yahay in uu ka hortago dhibaatada haweenka haysta ee kansarka ku dhaca minka,” ayuu yiri Axmed Rooble.
Hermez Joumana, wakiilka WHO ee Jabuuti, ayaa dhankeeda sheegtay in hay’addu bogaadineyso dadaallada soo socda, isla markaana ay ka go’an tahay inay si buuxda ula shaqeyso wasaaradda caafimaadka.
Xogtii ugu dambeysay ee WHO waxay muujineysaa in sanadkii 2023 Jabuuti laga diiwaangeliyay 71 kiis oo cusub oo kansarka ilmo-galeenka ah iyo 54 dhimasho ah, iyadoo heerka cudurku yahay 16.5 kiis 100,000 kasta oo haween ah sanadkii. Saadaasha ayaa tilmaamaysa in haddii wax tallaabo ah aan la qaadin, in ka badan 3,200 haween ay u dhiman karaan cudurkan inta ka dhiman 2070.
Dowladda Jabuuti ayaa ku adkaysatay in ololaha cusub ee tallaalka iyo wacyigelinta bulshada ay yihiin qayb ka mid ah dadaallada lagu xoojinayo caafimaadka haweenka iyo ilaalinta caafimaadka guud ee bulshada.