Jabuuti (Dawan) – Dowladda Jabuuti ayaa daahfurtay madal qaran oo dijitaal ah oo loogu talagalay adeegyada shaqada, taas oo lagu magacaabo “Djibouti Employment”, iyadoo dowladdu ay sheegtay in ay fududeyn doonto isku-xirka shaqo-doonka, shirkadaha iyo hay’adaha dowladda.
Madasha waxaa soo bandhigay Wasaaradda Shaqada ee Jabuuti, kadib xaflad ka dhacday magaalada Jabuuti, sida ay sheegtay Wakaaladda Wararka Jabuuti (ADI) Isniintii.
Munaasabadda daahfurka waxaa ka qaybgalay Wasiirka Shaqada, Yoanis Cali Geedi, iyo mas’uuliyiin ka tirsan wasaaradda.
Madashan cusub ayaa loogu talagalay in lagu mideeyo adeegyada Wasaaradda Shaqada iyo hay’adaha kale ee la xiriira shaqada, iyadoo dadka isticmaala ay si fudud uga heli karaan adeegyada iyo fursadaha ku saabsan suuqa shaqada.
Wasaaraddu waxay sheegtay in Djibouti Employment ay shaqo-doonka ka caawin doonto helitaanka fursadaha shaqo, halka shirkadaha iyo loo-shaqeeyayaasha ay u fududeyn doonto shaqaaleysiinta iyo raadinta shaqaale ku habboon baahidooda.
