Jabuuti, 5 Febraayo 2026 (Dawan)– Dowladda Jabuuti ayaa Arbacadii qabatay aqoon-is-weydaarsi lagu qiimeynayay dib-u-habeynta nidaamka maareynta qashinka adag, isla markaana lagu ansixinayay qorshe lagu xoojinayo awoodda hay’adaha iyo daneeyayaasha ka shaqeeya qaybtaas, sida ay sheegtay Wakaaladda Wararka Jabuuti (ADI).
Aqoon-is-weydaarsigan, waxaa guddoominayay Souleymaan Muumin Rooble, Xoghayaha Guud ee Wasaaradda Arrimaha Gudaha, waxaana ka soo qayb galay saraakiil sare iyo wakiillo ka socday Xafiiska Waddooyinka Jabuuti (OVD) iyo Wakaaladda Horumarinta Faransiiska (AFD).
Sida ay wakaaladdu warisay, ujeeddada kulanka ayaa ahayd in la ansixiyo natiijooyinka baaritaanka qaab-dhismeedka iyo nidaamka silsiladda maareynta qashinka adag, isla markaana lagu heshiiyo mudnaanta la siinayo dib-u-habeynta iyo xoojinta awoodaha hay’adaha ku lugta leh.
