Jabuuti (Dawan)— In la saadaaliyo roob culus ama kulayl daran kuma filna dal si joogto ah ugu nugul fatahaadaha, abaaraha iyo xaaladaha cimilo ee sii adkaanaya. Jabuuti waxay hadda doonaysaa in digniin kasta lagu lifaaqo saameynta ay yeelan karto iyo tallaabada ay tahay in la qaado kahor inta uusan khasaaruhu dhicin sida ay sheegtay wakaalada wararka jabuuti
Hay’adda Saadaasha Hawada Qaranka ee Jabuuti (ANM) iyo Xoghaynta Fulinta ee Maareynta Khataraha iyo Musiibooyinka (SEGRC) ayaa Axaddii magaalada Jabuuti ka furay aqoon-is-weydaarsi farsamo oo heer qaran ah. Kulanka oo ka dhacay Hotel Premium ayaa diiradda lagu saaraya hirgelinta saadaasha ku salaysan saameynta, iyadoo ay ka qeybgalayaan hay’adaha ku shaqada leh saadaasha hawada, maareynta masiibooyinka iyo gurmadka degdegga ah.
Shaqada socota waxay daboolaysaa khataraha ugu waaweyn ee dalka, oo ay ka mid yihiin fatahaadaha, roobabka culus, kulaylka daran, abaaraha iyo dabaylaha xooggan. Khubarada ayaa diyaarinaya jadwallo isku xiraya khatarta iyo saameynteeda, dejinaya heerarka digniinta, isla markaana qoraya habraacyo qeexaya masuuliyadda hay’ad kasta iyo sida loo mideynayo jawaabta degdegga ah.
