Jabuuti (Dawan) – Jabuuti ayaa heshay maalgelin ganacsi oo dhan $35 milyan si loogu taageero soo iibinta shidaalka ee shirkadda Red Sea Bunkering (RSB), sida ay Axaddii sheegtay Hay’adda Dekedaha iyo Aagagga Xorta ah ee Jabuuti.
Qoraal lagu daabacay barta X ee hay’adda ayaa lagu sheegay in guddoomiyaha hay’adda, Abuubakar Cumar Haadi, uu Xarunta Bandhigyada Caalamiga ah ee Jabuuti ku qaabilay wafdi ka socday Xafiiska Maalgelinta Ganacsiga Islaamka ee Caalamiga ah (ITFC), kaas oo uu hoggaaminayay Said Ben Afane Ibouroi.
Sida lagu sheegay qoraalka, kulanka ayaa diiradda lagu saaray iskaashiga labada dhinac iyo dhammaystirka maalgelinta ganacsi ee $35 milyan, taas oo loogu talagalay soo iibinta shidaalka ee shirkadda Red Sea Bunkering.
Labada dhinac ayaa sidoo kale dib u xaqiijiyay sii wadidda taageerada maalgelinta iyo dhammaystirka dukumiintiyada heshiiska la xiriira.
ITFC waa mid kamid ah hay’adaha hoos taga Kooxda Bangiga Horumarinta Islaamka, waxaana ay taageertaa maalgelinta ganacsiga, tamarta iyo mashaariicda kaabeyaasha dhaqaalaha ee dalalka xubnaha ka ah.
