Jabuuti oo ka sugeysa Mareykanka maalgashi tamarta ah

Jabuuti, 4 Febraayo 2026 (Dawan)— Jabuuti ayaa dadaal ugu jirta inay maalgashi ka hesho Mareykanka oo ku aaddan tamarta la cusboonaysiin karo iyo dhoofinta milixda, sida uu Talaadadii sheegay Maamulka Dekedaha iyo Aagagga Xorta ah ee Jabuuti (DPFZA).

Maamulka ayaa martigeliyay "Kulanka Ganacsiga ee Jabuuti iyo Mareykanka" (U.S.–Djibouti Business Trade Mission Roundtable) oo ka dhacay Xarunta Carwada Caalamiga ah ee Jabuuti, kaas oo lagu soo bandhigay fursadaha mashaariicda tamarta sida; Qorraxda,

Dabaysha, Kuleylka Dhulka iyo Tamarta Mowjadaha Badda.

Bayaanka Maamulka Dekedaha ayaa sheegay: “Kaabayaasha dhaqaalaha ee dekedahayaga iyo aagaggayaga xorta ah waxay u baahan yihiin tamar badan, waxaana diyaar u nahay in aan kala duwano ilaha tamarta si aan u soo jiidanno maalgashadayaal badan.”

Sidoo kale, Maamulka Dekedaha ayaa xusay kaydka milixda ee Jabuuti, kaas oo loo dhoofin karo Mareykanka, gaar ahaan xilliga qaboobaha. Saraakiishu waxay tilmaameen in Sharciga Kobaca iyo Fursadaha Afrika uu yahay fursad shirkadaha Mareykanka ugu suuq gali karaan Afrika, isla markaana soo hadal qaaday hindisaha "Sea–Air Cargo" oo isku xira 28 magaalo oo ku yaalla 25 waddan oo Afrikaan ah.

Sida laga soo xigtay Maamulka Dekedaha, hadda waxaa aagagga xorta ah ee Jabuuti ka hawlgala toddobo shirkadood oo Mareykan ah, marka loo eego wadarta 1,014 shirkadood oo caalami ah oo halkaas ku sugan.