Zimbabwe (Dawan) — Dalalka Afrika waa inay xoojiyaan xirfadaha iyo awoodda hay’adaha, isla markaana maal-gashadaan kaabayaasha tamarta la cusboonaysiin karo, sida uu sheegay wasiirka Tamarta Jabuuti oo ka hadlay kulan goboleed oo ay yeesheen dalalka Afrika.
Wasiirka Tamarta ee qaabilsan Kheyraadka Dabiiciga ah, Jaamac Mohamed Hassan, ayaa hadalkan ka jeediyay shirka siddeedaad ee wasiirrada ee Guddiga Goboleedka Afrika ee Isbahaysiga Caalamiga ah ee Tamarta Qoraxda (ISA), oo lagu qabtay Victoria Falls ee Zimbabwe.
Shirka ayaa looga hadlay sidii loo dardargelin lahaa adeegsiga tamarta qoraxda iyo sidii loo yareyn lahaa farqiga dhinaca helitaanka korontada ee qaaradda, sida ay sheegtay Wakaaladda Wararka Jabuuti ee ADI.
Kulanka waxaa ka qayb galay ku dhowaad 100 qof, oo ay ku jireen wasiirro Afrikaan ah oo qaabilsan tamarta, khuburo, maalgashadayaal, hay’ado caalami ah iyo hay’adaha horumarinta.
Wadahadallada ayaa diiradda lagu saaray maalgelinta mashaariicda tamarta qoraxda, koronto-siinta miyiga, horumarinta xirfadaha iyo hal-abuurka teknoolojiyadda, iyadoo sidoo kale laga hadlay xoojinta iskaashiga Koonfur-Koonfur.
Ajandaha shirka ayaa ka koobnaa afar qodob oo waaweyn: xoojinta xirfadaha, gaar ahaan iyada oo loo marayo xarumaha STAR-C; tamar-siinta beeraha iyo maalgelinta mashaariicda iyada oo loo marayo Africa Solar Facility; hal-abuurka teknoolojiyadda oo ay ku jiraan sirdoonka macmalka ah iyo digital-ka; iyo gaadiidka korontada iyo kaydinta tamarta.
