Jabuuti (Dawan)- Wasiirka Tamarta iyo Kheyraadka Dabiiciga ah ee Jabuuti, Jaamac Maxamed Xasan, ayaa wadahadallo la yeeshay Safiirka Mareykanka ee Jabuuti, Cynthia Kierscht, isagoo ka codsaday taageero farsamo iyo mid maaliyadeed oo lagu hirgelinayo qorshaha kala-guurka tamarta dalka.
Sida ay sheegtay Wasaaradda Tamarta iyo Kheyraadka Dabiiciga ah ee Jabuuti, kulanka ayaa diiradda lagu saaray mashaariicda mudnaanta u leh dalka, oo ay ka mid yihiin koronto gaarsiinta miyiga, kordhinta awoodda wax-soo-saarka korontada iyo horumarinta nidaamyada tamarta nadiifta ah.
Mas’uuliyiinta labada dhinac ayaa sidoo kale falanqeeyay mashaariicda socda iyo kuwa qorsheysan, oo ay ka mid yihiin xarun tamarta qorraxda laga dhaliyo oo laga hirgelinayo deegaanka Grand Bara, mashruuca hydrogen-ka cagaaran ee Moulhoule oo ka tirsan gobolka Obock, iyo mashaariic lagu soo saarayo tamar laga helo qashinka magaalada.
Wasiir Jaamac Maxamed Xasan ayaa sheegay in hirgelinta istaraatijiyadda kala-guurka tamarta ay laf-dhabar u tahay qorshaha warshadaynta iyo isbeddelka dhaqaalaha Jabuuti. Wuxuu xusay in dalka uu u baahan yahay iskaashi caalami ah si loo hirgeliyo heshiiska qaran ee tamarta, isagoo Mareykanka ka codsaday taageero farsamo iyo mid dhaqaale.
