Jabuuti (Dawan) – Dowladda Jabuuti ayaa markii ugu horreysay daahfurtay xarun casri ah oo lagu sameeyo qalliinnada wadnaha, taas oo loo arko horumar weyn oo laga gaaray adeegyada caafimaadka ee dalka iyo tallaabo lagu yareynayo baahida bukaanada loogu diri jiray dalal kale si ay u helaan daaweyn takhasus leh.
Madaxweynaha Jabuuti, Ismaaciil Cumar Geelle, ayaa si rasmi ah xarigga uga jaray xaruntan cusub oo laga hirgeliyay Isbitaalka Militariga ee Suudaan ee magaalada Jabuuti. Xaruntu waxay bixin doontaa adeegyo ay ka mid yihiin qalliinnada wadnaha iyo daaweynno kale oo heer sare ah oo ay fulinayaan dhakhaatiir ku takhasusay cudurrada wadnaha.
Madaxweyne Geelle ayaa sheegay in mashruucan uu ka dhashay dadaal muddo dheer socday oo lagu doonayay in dalka uu yeesho awood uu ku daboolo baahiyaha caafimaad ee ugu adag.
“Waxaan dooneynay inaan ka maarmo in bukaanadeenna dibadda loo diro. Wadnuhu waa xubinta ugu adag ee lagu sameeyo qalliinka, wuxuuna u baahan yahay aqoon, qalab casri ah iyo karti caafimaad. Dhammaan arrimahaas waxaa suurageliyay niyad-sami iyo waddaniyad,” ayuu yiri Madaxweyne Ismaaciil Cumar Geelle.
Mas'uuliyiinta caafimaadka ayaa sheegay in xaruntu ay durba ku guuleysatay qabashada laba qalliin oo wadne oo lagu daweeyay bukaano reer Jabuuti ah, kuwaas oo si wanaagsan uga soo kabanaya.
