JABUUTI, 3 November 2025 — Dowladda Jabuuti ayaa ku dhawaaqday 22 haween oo ah saraakiishii badda ah kuwaas oo ah kuwii ugu horreyey ee dalka ay si rasmi ah u bilaabeen shaqooyinkooda, taas oo astaan u ah dadaallada lagu dhisayo xirfadlayaal badeed oo aqoon leh isla markaana lagu ballaarinayo kaalinaha haweenka ee hawlaha istaraatiijiga ah ee dekedaha.
Haweenkan ayaa ka howlgeli doona Hay’adda Dekedaha iyo Goobaha Xorta ah ee Jabuuti (DPFZA), halkaas oo ay ku maamuli doonaan dhaq-dhaqaaqa maraakiibta, hirgelin doonaan xeerarka badda, isla markaana ka shaqeyn doonaan sidii loo hubin lahaa howlgal ammaan ah oo hufan oo ka socda mid ka mid ah marinada ugu muhiimsan ee maraakiibta caalamiga ah.
Kooxdan — oo ka koobnayd 18 sarkaal iyo afar injineer badeed — ayaa dhammeystay tababar heer caalami ah oo badda ah bishii September, iyagoo ka soo baxay Jaamacadda Carabta ee Sayniska, Tignoolajiyada iyo Gaadiidka Badda ee Alexandria, Masar. Waxay barnaamijkan bilaabeen 2021 iyagoo qayb ka ah dadaal dowladeed oo lagu xoojinayo khibradda dalka ee arrimaha badda.
“Soo laabashadooda waxay calaamad u tahay guul taariikhi ah oo Djibouti u soo hoyatay, iyadoo kor loo qaaday awood-siinta haweenka iyo ballaarinta doorkooda mustaqbalka ee qaybta badda iyo saadka dalka,” ayay tiri DPFZA.
Jabuuti ayaa haatan ballaarinaysa mashaariic waaweyn oo saadka iyo warshadaha ah, oo ay ku jiraan xarunta warshadaha Damerjog iyo balaarinta goobaha ganacsiga xorta ah, iyagoo tartamaya xarumaha maraakiibta iyo kaydinta caalamiga ah.
Masuuliyiinta hay’adda ayaa sidoo kale xaqiijiyay in laga dhisi doono guda Jabuuti laan ka mid ah Jaamacadda Carabta ee Sayniska, taasoo noqon doonta campus-kii ugu horreeyay ee jaamacadda ee Geeska Afrika, isla markaana siin doonta fursado tababar badeed oo ballaaran dhallinyarada gobolka.
