New York (Dawan)— Jabuuti ayaa dalalka Ururka Iskaashiga Islaamka (OIC) ugu baaqday inay xoojiyaan dadaallada diblomaasiyadeed ee Falastiin, isla markaana ay sii wadaan ka shaqaynta xaaladaha Suudaan iyo Yemen, sida ay Jimcihii sheegtay wakaaladda wararka Jabuuti ee ADI.
Wasiirka Arrimaha Dibadda Jabuuti Cabdulqaadir Xuseen Cumar ayaa baaqa ka jeediyay shirkii sanadlaha ahaa ee isku dubbaridka wasiirrada arrimaha dibadda OIC, oo 23-kii Sebtembar ka dhacay New York, xilli ay socdeen kulamada Golaha Guud ee Qaramada Midoobay. Wuxuu sheegay in arrinta Falastiin ay tahay inay mudnaanta koowaad ku yeelato waxqabadka wadajirka ah ee ururka. Sidoo kale, wuxuu ku baaqay in aan la dayicin xaaladda dadka Rohingya, sida ay ADI sheegtay.
