Jabuuti oo wacdaro ka dhigtay tartan orod oo ay martigelisay

Jabuuti, 24 Janaayo 2026 (Dawan) – Orod-yahanka lagu magacaabo Muxudiin Cabdi Wacays, oo ka tirsan Ilaalada Jamhuuriyadda Jabuuti, ayaa ku guuleystay horyaalka tartanka 25-aad ee Nus-Maaradoonka Caalamiga ah ee Jabuuti, kaas oo Jimcihii ka dhacay caasimadda dalkas, isla markaana noqday mid si weyn u muujiyay awoodda sii kordheysa ee Jabuuti ee dhanka orodka masaafada dheer.

Tartankan, waxaa ka qayb galay orod-yahanno ka kala socday dalalka Itoobiya, Soomaaliya, Koonfurta Suudaan, Zaambiya, Burundi, Angola, Kenya iyo dalka martigeliyay ee Jabuuti.

Tartanka oo ahaa mid aad u adag, ayay orod-yahannada Jabuuti ugu dambeyn xaqiijiyeen inay wada hantaan saddexda kaalin ee ugu sarreeya.

Muxudiin Cabdi Wacays ayaa galay kaalinta koowaad, isagoo ka hor maray Hani Idiris Xirsi oo ka tirsan Ilaalada Xeebaha Jabuuti, kaas oo muujiyay horumar la taaban karo marka loo eego tartamadiisi hore, kuna dhammaystay kaalinta labaad. Halka Ayaanle Cabdi Cabdillaahi, oo isna ka tirsan Ilaalada Jamhuuriyadda, uu galay kaalinta saddexaad.

Muumin Geelle, oo saddex jeer hore ugu guuleystay tartankan isla markaana hadda ah tababare, ayaa sheegay in guusha maanta ay caddeyn u tahay tayada jiil cusub oo si nidaamsan loo tababaray. “Maanta waxaan aragnaa fac edeb leh, si fiican loo taageeray, lana tartami kara orod yahannada ugu wanaagsan gobolka,",” ayuu yiri.

Tartankan 25-aad ee Nus-Maaradoonka Caalamiga ah ayaa waxaa soo qabanqaabiyay Xiriirka Ciyaaraha Fudud ee Jabuuti, iyadoo ay taageeraysay shirkadda Jabuuti-Telecom, waxaana si toos ah looga baahiyay idaacadda qaranka. Inta lagu guda jiray munaasabadda, xiriirku wuxuu sidoo kale qabtay tartanno kale oo ay ka mid yihiin orodka 10-ka kiiloomitir ee wiilasha iyo orodka 5-ta kiiloomitir ee gabdhaha.

Inkasta oo Geeska Afrika si taariikhi ah loogu yaqaan awoodda orod-yahannada Itoobiya iyo Kenya, haddana Jabuuti ayaa sanadihii u dambeeyay si qorsheysan uga faa’iideysatay hay’adaha ciidanka iyo amniga—gaar ahaan Ilaalada Jamhuuriyadda—si ay u dhisto ciyaartooy xirfad leh oo awood u leh inay dalkooda ku matalaan, kuna difaacaan calanka Jabuuti tartamada heer gobol iyo caalami ah.