Jabuuti (Dawan) – Wasaaradda Shaqada ee Jabuuti ayaa furtay aqoon-is-weydaarsi saddex-geesood ah oo ay isugu yimaadeen mas’uuliyiin ka tirsan dowladda, ururrada shaqaalaha iyo loo-shaqeeyayaasha, si loo xoojiyo badqabka iyo caafimaadka goobaha shaqada, sida ay sheegtay warbaahinta dowladda.
Wasiirka Shaqada, oo u qaabilsan nidaaminta shaqada iyo ilaalinta bulshada, Yoonis Cali Geeddi, ayaa Axaddii si rasmi ah uga furay aqoon-is-weydaarsiga ka socda Kempinski Palace ee magaalada Jabuuti. Kulankan oo soconaya 29-ka Juun illaa 2-da Luulyo ayaa waxaa taageeraya Ururka Shaqaalaha Adduunka (ILO).
Aqoon-is-weydaarsiga ayaa diiradda lagu saarayaa horumarinta badqabka iyo caafimaadka shaqada, xoojinta awoodda hay’adaha qaranka, iyo aqoonsiga hababka ugu wanaagsan ee looga hortago khataraha ka dhasha goobaha shaqada.
Khabiir ku takhasustay badqabka iyo caafimaadka shaqada oo lagu magacaabo Nadia ayaa hoggaamineysa tababarrada iyo casharrada, iyadoo ka qeyb galayaasha kala duwan ee saddexda dhinac ay si wadajir ah uga qeyb qaadanayaan doodaha iyo falanqaynta.
