Jadwalka doorashooyinka Galmudug, Hirshabeelle iyo Waqooyi Bari oo la shaaciyay

Muqdisho (Dawan) – Guddiga Madaxa-bannaan ee Doorashooyinka Qaranka iyo Soohdimaha ayaa si rasmi ah u shaaciyay jadwalka doorashooyinka isku sidkan ee goleyaasha deegaanka iyo wakiillada ee dowlad-goboleedyada Galmudug, Hirshabeelle iyo Waqooyi Bari.

Afhayeenka guddiga, Cabdiftaax Faysal Xuseen, oo war-saxaafadeedka guddiga soo jeediyay, ayaa sheegay in doorashooyinka Galmudug iyo Hirshabeelle la qaban doono 13-ka May, halka doorashada goleyaasha deegaanka ee dowlad-goboleedka Waqooyi Bari loo asteeyay 30-ka June ee sanadkan.

Guddiga ayaa sidoo kale xusay in diyaar-garowga doorashooyinka uu marayo heer gabagabo ah, iyadoo la dhameystiray diiwaangelinta codbixiyeyaasha, qaybinta kaararka aqoonsiga, asteeynta goobaha codbixinta, iyo tababarka shaqaalaha ku-meel-gaarka ah ee maalinta doorashada.

Waxaa kale oo la sheegay in la soo xulay musharrixiinta u tartamaya goleyaasha deegaanka iyo golaha wakiillada, iyadoo xisbiyada siyaasadda lagu wargeliyay inay soo gudbiyaan liisaska wakiilladooda ee goobaha codbixinta ee dowlad-goboleedka Koonfur-galbeed, isaga oo caddeeyay in aysan waxba iska beddelin jadwalka doorashada deegaanada Koonfur-galbeed.

Guddiga Doorashooyinka ayaa caddeeyay in qorshahan uu qayb ka yahay wejiga labaad ee hirgelinta doorashooyinka goleyaasha deegaanka, kaas oo lagu dhaqangelinayo si waafaqsan xeerka doorashooyinka qaranka.

Guddigu wuxuu ugu baaqay shacabka Soomaaliyeed inay ka faa’iideystaan fursaddan dimuqraadiyadeed, kana qeyb qaataan doorashooyinka, halka xisbiyada siyaasaddana lagu dhiirrigeliyay inay si buuxda u dhammaystiraan howlaha la xiriira musharrixiinta iyo wakiillada doorashada.