Jigjiga (Dawan) – Madaxweynaha Dowlad Deegaanka Soomaalida, Mustafe Muxummed Cumar, ayaa Isniintii dhagax-dhigay mashruuc lagu dhisayo 20 guri oo loogu talagalay qoysaska danyarta ah ee ku nool magaalada Jigjiga.
Mashruucan ayaa qayb ka ah barnaamijyada tabarucaadka xilliga xagaaga ee xukuumaddu ku taageereyso qoysaska nugul iyo dadka dakhligoodu hooseeyo, iyadoo diiradda la saarayo kor u qaadista nolosha bulshada u baahan garab istaagga dowladda.
Guryaha la dhisayo ayaa gaaraya 20 guri, iyadoo guri kasta loo qorsheeyay inuu ka koobnaado saddex qol. Mas’uuliyiinta ayaa sidoo kale xusay in isla deegaankaas hore looga hirgeliyay 15 guri oo la mid ah kuwa hadda la dhagax-dhigay, kuwaas oo ay deggen yihiin qoysas danyar ah, gaar ahaan dadka qaba baahiyaha gaarka ah.
“Guud ahaan guryahaan waxay ka koobnaan doonaan 20 guri, guri kasta waxa uu ka koobnaan doonaa 3 qol; waxay ka koobnaan doonaan laba qol jiif, fadhi iyo jiko, sidoo kalena goobtu waxay leedahay biyo iyo adeegyada aasaasiga ah,” ayaa lagu sheegay faahfaahinta mashruuca.
