Kenya Airways oo hakisay duullimaadyadii Imaaraadka

Nairobi (Dawan) – Shirkadda diyaaradaha ee Kenya Airways ayaa si ku meel gaar ah u hakisay dhammaan duullimaadyadii ay ku tagi jirtay Isutagga Imaaraadka Carabta, kaddib markii la xiray hawada dalkaas, taasoo carqalad ku noqotay qorshayaashii safar ee rakaabka u socday Dubai iyo Sharjah.

War-saxaafadeed ay shirkaddu soo saartay maanta oo ku beegan 28-ka Febraayo ayay ku sheegtay in go’aankaasi uu yahay mid taxaddar amni oo lagu ilaalinayo badqabka rakaabka iyo shaqaalaha.

“Waxaan si ku meel gaar ah u hakinnay duullimaadyadii Dubai iyo Sharjah ilaa amar dambe, sababo la xiriira xiritaanka hawada Imaaraadka,” ayaa lagu yiri bayaanka.

Shirkaddu waxay xaqiijisay in la joojiyay duullimaadyada lambarradoodu kala yihiin KQ310, KQ311, KQ304 iyo KQ305, iyo sidoo kale adeegyada xamuulka ee ku shaqeynayay khadkan.

Kenya Airways ayaa raalligelin ka bixisay saameynta ay arrintani ku yeelatay macaamiisha, iyadoo sheegtay in howlwadeenadeedu si toos ah ula xiriirayaan rakaabka si loo siiyo xogta lagama maarmaanka ah. Waxay intaas ku dartay in duullimaadyada dib loo bilaabi doono marka la xaqiijiyo in xaaladdu ammaan tahay.

Shirkaddu waxay ugu baaqday rakaabka inay la socdaan boggeeda internetka iyo barnaamijka taleefanka si ay u helaan wararkii ugu dambeeyay, ama ay la xiriiraan adeegga macaamiisha.