Muqdisho (Dawan) – Ra’iisul wasaarihii hore ee Soomaaliya, Xasan Cali Khayre, ayaa ka digay cawaaqibka ka dhalan kara dhaqdhaqaaq ciidan oo uu sheegay inuu dowladda ku beegsanayso guryaha ay Muqdisho ka deggan yihiin madaxdii hore ee qaranka. Digniintan ayaa timid xilli xiisad siyaasadeed ay ka taagan tahay caasimadda.
Qoraal uu soo dhigay bartiisa Facebook, Khayre wuxuu sheegay in daandaansiga iyo dhaqdhaqaaqyada ciidan ee uu ku tilmaamay “taliska Madaxweynaha muddo-xileedkiisu dhammaaday” ay abuurayaan jawi colaadeed, kuna horseedi karaan caasimadda xasillooni-darro, qalalaaso amni iyo hubanti la’aan siyaasadeed.
Khayre ayaa Madaxweyne Xasan Sheekh Maxamuud ku eedeeyay inuu “u oomman yahay dhiig,” kuna hawlan yahay ficillo uu ku bannaynayo dhiigga madaxdii hore. Wuxuu sheegay in Madaxweynuhu qaadayo mas’uuliyadda cawaaqib kasta oo ka dhasha tallaabooyinkaas.
“Awood ciidan iyo cagajugleyn laguma xallin karo xaaladda murugsan ee dalku ku jiro,” ayuu yiri Khayre, isagoo ku baaqay in dib loogu laabto miiska wada-hadalka si heshiis looga gaaro doorashada, loona helo dowlad sharciyad leh.
