Muqdisho (Dawan) – Ra’iisul Wasaarihii hore ee Soomaaliya, Xasan Cali Kheyre, ayaa sheegay in hal qof lagu dilay, tiro kalena lagu dhaawacay bannaanbax ka dhacay degmada Deyniile ee magaalada Muqdisho.
Xasan Cali Kheyre ayaa tacsi u diray ehelada iyo qaraabada qofka ku dhintay bannaanbaxa, isagoo sheegay in dhacdadu timid xilli dad Soomaaliyeed ay si nabad ah u muujinayeen dareenkooda.
“Waxaan u tacsiyeynayaa ehelada iyo qaraabada ay ka geeriyoodeen dadka ku naf waayay maanta bannaanbaxeenna nabadeed ee ka dhacay magaalada Muqdisho, gaar ahaan degmada Deyniile,” ayuu yiri Kheyre.
Ra’iisul Wasaarihii hore ayaa sheegay in inta la xaqiijiyay hal qof uu dhintay, halka tiro kalena ay dhaawacmeen, isagoo sidoo kale dowladda ku eedeeyay inay rasaas u adeegsatay bannaanbaxayaal uu ku tilmaamay inay si nabad ah u cabbirayeen dareenkooda.
