Baydhabo (Dawan) — Dowlad Goboleedka Koonfur Galbeed Soomaaliya ayaa Xabsiga Dhexe ee Baydhabo ka bilowday barnaamij waxbarasho oo loogu talagalay maxaabiista, iyadoo ujeeddadu tahay in loo fududeeyo helitaanka waxbarashada, isla markaana kor loo qaado fursadaha ay ugu diyaar garoobi karaan dib ugu laabashada bulshada marka ay xabsiga ka baxaan.
Barnaamijka ayaa Isniintii si rasmi ah looga daahfuray Baydhabo, waxaana munaasabadda ka qeybgalay mas’uuliyiin ka tirsan Koonfur Galbeed, oo ay ku jiraan wasiirrada waxbarashada iyo caddaaladda, iyo saraakiil sare oo ka tirsan Ciidanka Asluubta.
Barnaamijkan waxaa hirgelintiisa hormuud ka ahaa Taliyaha Ciidanka Asluubta Soomaaliyeed, Sareeye Gaas Maxamed Sheekh Xasan Xaamud, kaas oo door hoggaamineed ka qaatay sidii macallimiin loogu keeni lahaa xabsiga, sida ay sheegeen mas’uuliyiinta munaasabadda.
Cali Cabdi Maxamed, Taliyaha Ciidanka Asluubta Qaybta Gobolka Bay, ayaa sheegay in barnaamijku maxaabiista u oggolaanayo inay sii wataan waxbarashadooda inta ay xabsiga ku jiraan, isla markaana ay bulshada ugu laabtaan aqoon iyo xirfado dheeraad ah.
Dhamme Cabdullaahi Xasan Cali, Taliyaha Xabsiga Dhexe ee Baydhabo, ayaa sheegay in barnaamijku maxaabiista siinayo fursad ay waqtiga ay xabsiga ku jiraan uga faa’iideystaan waxbarashada.
Maxamed Cusmaan Xaaji Jiidow, Wasiirka Wasaaradda Waxbarashada, Hiddaha iyo Tacliinta Sare ee Dowladda Koonfur Galbeed Soomaaliya, ayaa sheegay in wasaaraddiisu ay barnaamijka ku taageeri doonto fasallo, kuraas, miisas, buugaag, sabuurado iyo agab kale oo waxbarasho. Wuxuu sheegay in wasaaraddu sidoo kale la socon doonto horumarka ardayda iyo xaaladda waxbarashadooda.