Baydhabo (Dawan) — Dowlad Goboleedka Koonfur Galbeed Soomaaliya ayaa digniin ka soo saartay halista roobabka xooggan, dabaylaha iyo fatahaadaha la saadaaliyey, iyadoo shacabka ugu baaqday inay muujiyaan feejignaan dheeraad ah, kana fogaadaan goobaha ay khatarahani saameyn karaan.
Wasaaradda Warfaafinta iyo Wacyigelinta Bulshada ee Koonfur Galbeed ayaa sheegtay in roobab xooggan iyo dabaylo ay ka jiraan deegaanno ka tirsan dalka. Wasaaraddu waxay bulshada kula talisay inay ka fogaadaan togagga, wabiyada iyo dhulka hoose ee ay biyuhu ku soo fatahi karaan. Waxay sidoo kale ka digtay khataraha ka dhalan kara dabaylaha xooggan, iyadoo dadka kula talisay inaysan hoos fariisan geedaha waaweyn ama u dhowaan dhismayaasha aan adkayn.
Wasaaraddu waxay waalidiinta ugu baaqday inay carruurtooda ka ilaaliyaan goobaha halista ah, iyadoo bulshada ku boorrisay inay iska kaashadaan badbaadinta dadka nugul, gaar ahaan waayeelka, carruurta iyo dadka baahiyaha gaarka ah qaba.
