Baydhabo (Dawan)- Magaalada Baydhabo ee gobolka Bay waxaa subaxnimadii maanta ka qarxay dagaal culus oo bilowday xilliggii salaadda subax, iyadoo War-saxaafadeed caawa kasoo baxay maamulka Koonfur Galbeed lagu sheegay in ciidamada dowladda iyo kuwa maamulka ay iska caabiyeen weerar ay soo qaadeen xubno maamulka ku tilmaamay Al-Shabaab, oo ay weheliyeen ciidamo taageersan madaxweynihii hore, Cabdicasiis Laftagareen.
Maamulka ayaa sheegay in dagaalka lagu dilay in ka badan 70 xubnood, qaar ka mid ah dadka dhintayna ay ahaayeen ajaanib. Hase yeeshee, tiradan iyo aqoonsiga dadka la sheegay in la dilay ayaan weli helin xaqiijin madax-bannaan.
Wasaaradda Gaashaandhigga Soomaaliya ayaa iyaduna sheegtay in kooxihii weerarka soo qaaday khasaaro culus la gaarsiiyay, balse ma aysan shaacin tiro rasmi ah.
