Muqdisho (Dawan)— Dowladda Soomaaliya ayaa Liibiya ka soo celisay 181 muwaadin , iyadoo taageero ka heleysa Midowga Yurub iyo Hay’adda Caalamiga ah ee Socdaalka (IOM), sida ay Isniintii sheegtay Hay’adda Qaxootiga iyo Barakacayaasha Qaranka (NCRI). Muwaadiniinta la soo celiyay ayaa ku xayirnaa Liibiya, halkaas oo ay kala kulmeen xaalado adag, sida ay sheegtay NCRI oo xustay in soo celintoodu qeyb ka tahay dadaallada lagu xaqiijinayo in muwaadiniinta Soomaaliyeed ay si ammaan ah oo sharaf leh ugu soo laabtaan dalkooda.
Inta badan muwaadiniinta ayaa ka soo degay Garoonka Caalamiga ah ee Aadan Cadde ee Muqdisho, halka 34 ka mid ah la geeyay magaalada Hargeysa, sida ay sheegtay NCRI. Qaar ka mid ah muwaadiniinta la soo celiyay ayaa laga soo qaaday Suudaan, halka tirada ugu badan ay ka yimaadeen Liibiya, sida ay hay’addu sheegtay.
Mas’uuliyiin ka kala socday Wasaaradda Arrimaha Dibadda iyo Iskaashiga Caalamiga ah, Xafiiska Ergayga Gaarka ah ee Madaxweynaha u qaabilsan Soo-celinta Muhaajiriinta iyo Xuquuqda Carruurta, NCRI, Midowga Yurub iyo IOM ayaa muwaadiniinta ku soo dhoweeyay Garoonka Aadan Cadde.
NCRI ayaa sheegtay in muwaadiniinta la soo celiyay markii dambe loo qaaday mid ka mid ah xarumaheeda ku yaalla Muqdisho, halkaas oo lagu siin doono hoy ku-meel-gaar ah iyo adeegyada aasaasiga ah. Hay’addu waxay sheegtay in adeegyada loo fidinayo ay ka mid yihiin cunto, daryeel caafimaad, taageero nafsiyeed iyo bulsho, iyo sidoo kale caawimaad ku saabsan sidii ay dib ula xiriiri lahaayeen qoysaskooda.
