Muqdisho (Dawan)- Kulankii Sabtidii dhexmaray Safiirka Turkiga ee Soomaaliya, Alper Aktaş, iyo Madaxweyne Xasan Sheekh Maxamuud ayaa dhaliyay dood siyaasadeed oo xooggan, xilli mucaaradka Soomaaliyeed ay ku doodayaan in 15-ka May ay ku egtahay muddo-xileedka dastuuriga ah ee madaxweynaha.
Safaaradda Turkiga ee Muqdisho ayaa boggeeda X (Twitter) ku sheegtay in kulanka looga hadlay xiriirka laba geesoodka ah, arrimaha gobolka iyo iskaashiga istiraatiijiga ah ee labada dal. Hase yeeshee, waxa si weyn dareenka u soo jiitay in qoraalka safaaradda loogu adeegsaday Xasan Sheekh darajada “Madaxweyne”, arrintaas oo mucaaradka u arkeen fariin siyaasadeed oo xambaarsan taageero cad.
Kulanka ayaa kusoo aaday laba maalin kadib markii wadahadalladii dowladda iyo mucaaradka ee Muqdisho kusoo dhammaadeen natiijo la’aan, iyadoo weli la isku mari la’yahay hannaanka doorashooyinka iyo dib-u-habeynta dastuurka.
Xildhibaan Cabdiraxman Cabdishakuur Warsame oo kamid ah siyaasiyiinta mucaaradka ayaa si adag uga falceliyay qoraalka safaaradda Turkiga, isaga oo sheegay in tallaabadaasi ay abuureyso walaac siyaasadeed.
“Go’aanka dowladda Turkiga ay si cad ugu muujisay taageerada ay u hayso Xasan Sheekh Maxamuud kadib dhammaadka muddo-xileedkiisa dastuuriga ah… waxay diraysaa farriin siyaasadeed oo si weyn walaac u abuureysa,” ayuu yiri Cabdiraxmaan Cabdishakuur.
Siyaasigan ayaa lagu xantaa inuu xiriir dhow la leeyahay dowladda Imaaraadka Carabta, oo siyaasiyad ahaan ay Turkiga ku loolamaan danaha gobolka.
Dhankiisa, xildhibaan Cabdullaahi Faarax Mire ayaa sheegay in fariinta Turkigu ay u muuqato taageero loo muujinayo maamul ay sharciyaddiisa siyaasadeed muran ka taagan tahay.
