Laba Cabdulqaadir: Yaa ku guuleysan doona Guddoomiyaha Golaha Shacabka?

Muqdisho (Dawan) — Cabdulqaadir Maxamed Nuur (Jaamac) iyo Cabdulqaadir Cumar Macallin (Daada) ayaa isagu soo haray tartanka kursiga Guddoomiyaha Golaha Shacabka, iyadoo xildhibaannada Golaha Shacabka ay maalinta Isniinta ah ee 10-ka Agoosto 2026 go’aamin doonaan cidda hoggaamin doonta aqalka hoose ee Baarlamaanka Federaalka Soomaaliya.

Labada musharrax ayaa Sabtidii, 8-da Agoosto, shahaadooyinka musharraxnimada ka qaatay guddiga doorashada, kaddib markii ay buuxiyeen shuruudihii loo dejiyey tartanka.

Doorashadan ayaa kusoo aadeysa xilli uu dalka ka jiro loollan siyaasadeed oo xooggan oo u dhexeeya dowladda iyo mucaaradka, kaas oo la xiriira arrimaha dastuurka, muddo-xileedyada iyo jihada doorashooyinka dalka.

Laba Cabdulqaadir: Yaa ku guuleysan doona Guddoomiyaha Golaha Shacabka?

Bilowgii 2026, xildhibaanno mucaarad ah ayaa si xooggan uga hor yimid wax-ka-beddellada dastuurka ee baarlamaanka la horgeeyay, halka xiisadda u dhexeysa dowladda iyo hoggaamiyeyaasha mucaaradku ay bishii Juun gaartay iska horimaadyo hubeysan oo Muqdisho ka dhacay.

Kursiga Guddoomiyaha Golaha Shacabka ayaa bannaanaaday kaddib markii Guddoomiyihii hore ee Golaha Shacabka, Sheekh Aadan Maxamed Nuur Madoobe, loo doortay Hoggaamiyaha Dowlad-goboleedka Koonfur Galbeed.

Tan iyo 20-kii Juun, Guddoomiye Ku-xigeenka Koowaad ee Golaha Shacabka, Sacdiya Yaasiin Xaaji Samatar, ayaa si ku-meel-gaar ah u hoggaaminaysay Golaha Shacabka.

Ka hor inta aysan isku soo harin labada xildhibaan, waxaa musharraxiinta ka mid ahaa Saadaad Maxamed Nuur Caliyow, oo iska casilay xilkii Wasiiru-dowlaha Arrimaha Gudaha, Federaalka iyo Dib-u-heshiisiinta si uu ugu tartamo Guddoomiyaha Golaha Shacabka.

Waxaa sidoo kale tartanka isaga baxay xubno kale oo dowladda ka tirsan, oo uu ku jiray Wasiirka Arrimaha Dibadda, hase yeeshee markii la gaaray diiwaangelinta kama dambaysta ah, tartanku wuxuu kusoo ururay labada Cabdulqaadir.

Kalfadhiga 8-aad ee Baarlamaanka Federaalka Soomaaliya ayaa furmay 1-dii Agoosto, iyadoo mudanayaasha labada aqal dib loogu yeeray Muqdisho.

Tartanka Guddoomiyaha Golaha Shacabka ayaa sii xoojiyey dhaq-dhaqaaqa siyaasadeed ee magaalada, waxaana Muqdisho ku sugan xildhibaanno badan oo bilihii hore dalka gudihiisa iyo dibaddiisa ku kala maqnaa.