Jabuuti (Dawan) — Madaxweynaha Jabuuti, Ismaaciil Cumar Geelle, ayaa maanta oo Isniin ah waraaqaha aqoonsiga danjirenimo ka guddoomay shan safiir oo cusub oo dalalkoodu u soo magacaabeen Jabuuti, kadib munaasabad ka dhacday Qasriga Madaxtooyada, sida ay sheegtay Wakaaladda Wararka Jabuuti (ADI).
Safiirrada cusub ayaa kala ah Hüseyin Özdemir oo matalaya Turkiga, Frank Neumann oo Jarmalka ka socda, Vasilii Livichuk oo Ruush ah, Dr. David Ian Hall oo Ingiriiska u fadhin doona Jabuuti iyo Julio Cesar Sanchez oo Cuba ah. Shanta safiir ayaa si rasmi ah u bilaabaya waajibaadkooda diblomaasiyadeed, iyagoo xaruntoodu noqon doonto magaalada Jabuuti.
Intii ay socotay munaasabadda, safiirradu waxay muujiyeen sida ay uga go'an tahay xoojinta xiriirka saaxiibtinimo iyo iskaashiga dalkiisa kala dhexeeya Jabuuti.
Safiirka cusub ee Turkiga, Hüseyin Özdemir, ayaa sheegay inuu ka shaqeyn doono sii xoojinta xiriirka soo jireenka ah ee labada dal, kaas oo ku dhisan iskaashi, is-ixtiraam iyo wadajir. Waxa uu sidoo kale bogaadiyey doorka Jabuuti ee xasilloonida iyo wada-hadallada gobolka Geeska Afrika, isagoo si gaar ah u xusay hoggaanka ay hadda ka hayso Urur-goboleedka IGAD iyo dadaallada ay ku taageerto xalinta khilaafaadka si nabadeed.
Dhankiisa, Safiirka Jarmalka, Frank Neumann, ayaa sheegay in Jabuuti ay muddo ku dhow 50 sano ahayd saaxiib muhiim ah oo Jarmalku ku leeyahay gobolka, isagoo ballanqaaday inuu ka shaqeyn doono horumarinta xiriirka labada dal.
Safiirka Ruushka, Vasilii Livichuk, ayaa sheegay in mudnaantiisa ay ka mid noqon doonaan xoojinta wada-hadallada siyaasadeed, ballaarinta xiriirka ganacsi iyo dhaqaale, iyo horumarinta iskaashiga dhaqanka iyo xiriirka bulshada labada dal.
