Soomaaliya, (Dawan) – Madaxweynaha Soomaaliya, Xasan Sheekh Maxamuud, ayaa sanadkii afaraad oo xiriir ah maalgelinaya Tartanka Qaran ee Xifdinta Qur’aanka Kariimka.
Wasaaradda Awqaafta iyo Arrimaha Diinta ee Soomaaliya ayaa 26-kii bishan si rasmi ah uga daahfurtay magaalada Muqdisho Tartanka Sanadlaha Heerka Qaran ee Xifdinta Qur’aanka Kariimka. Tartankan oo ah mid si weyn loo sugayay ayaa waxaa ka qeybgalaya arday ka kala yimid deegaano kala duwan oo dalka ah.
Wasiir ku-xigeenka Wasaaradda Awqaafta iyo Arrimaha Diinta, Cismaan Axmed, ayaa sheegay in kharashaadka ku baxaya tartanka sanadkan uu si buuxda u damaanad qaaday Madaxweynaha Jamhuuriyadda, taas oo ka dhigan in xafiiska madaxweynuhu uu sii wado doorkiisa ku aaddan taageeridda barnaamijyada diimeed ee heer qaran.
“Qarashkaas iyo dhaqaalahas waxaa si Buuxda u kafaala qaaday Madaxweynaha Soomaaliya Xasan Shiikh Maxamuud, waa heer qaran, qarashkaas waxaa iska leh madaxweynaha, isagaa looga duceynayaa, oo mahadaas iska leh” Cismaan Axmed Wasiir ku-xigeenka Wasaaradda Awqaafta iyo Arrimaha Diinta.
